ញត្តិគាំទ្រ ចំពោះការប្រកាស និងការដាក់ឱ្យប្រើប្រាស់ “ធម្មនុញ្ញវិជ្ជាជីវៈសារព័ត៌មានកម្ពុជា”យើងខ្ញុំជាថ្នាក់ដឹកនាំ និងសមាជិក នៃសមាគមសារព័ត៌មាន អេឡិចត្រូនិច អឹម អេស ជេ (AEMSJ) សូមគាំទ្រ ចំពោះការដាក់ឲ្យប្រើប្រាស់ “ធម្មនុញ្ញវិជ្ជាជីវៈសារព័ត៌មានកម្ពុជា” ដែលមានគោលដៅតម្រង់ទិសអ្នកសារ ព័ត៌មានកុំឱ្យដើរហួសដែនកំណត់នៃច្បាប់ និងជួយលើកកម្ពស់ក្រមសីលធម៌វិជ្ជាជីវៈរបស់សមាគមសារព័ត៌មាន អង្គភាពស្ថាប័នសារព័ត៌មាន និងអ្នកសារព័ត៌មានឱ្យគោរព និងប្រតិបត្តិគោលការណ៍ក្រមសីលធម៌ឱ្យបានត្រឹមត្រូវ។ សមាគមសារព័ត៌មាន អេឡិចត្រូនិច អឹម អេស ជេ (AEMSJ) មើលឃើញថា “ធម្មនុញ្ញវិជ្ជាជីវៈសារព័ត៌មាន កម្ពុជា” បានលើកពីគោលការណ៍គ្រឹះជាមូលដ្ឋាននៃវិជ្ជាជីវៈសារព័ត៌មាន និងការផ្សព្វផ្សាយព័ត៌មាន ដែលប្រមូលធាតុ ចូលដ៏សំខាន់សម្រាប់អ្នកសារព័ត៌មានយកទៅអនុវត្ត ដើម្បីជៀសផុតពីការចោទប្រកាន់ ឬល្មើសច្បាប់ព្រហ្មទណ្ឌជាដើម។ ជាមួយគ្នានេះសមាគមសារព័ត៌មាន អេឡិចត្រូនិច អឹម អេស ជេ (AEMSJ) សូមចូលរួមគាំទ្រយ៉ាងពេញទំហឹង ចំពោះការផ្សព្វផ្សាយ និងការប្រកាសដាក់ឱ្យប្រើប្រាស់ជាផ្លូវការនូវ “ធម្មនុញ្ញវិជ្ជាជីវៈសារព័ត៌មានកម្ពុជា” ដែល បានរៀបចំឡើងដោយក្រសួងព័ត៌មានកាលពីថ្ងៃទី០៦ ខែសីហា ឆ្នាំ២០២៤ ក្នុងសន្និសីទសារព័ត៌មាន នៃទីស្តីការក្រសួង ព័ត៌មាន។សមាគមសារព័ត៌មាន អេឡិចត្រូនិច អឹម អេស ជេ (AEMSJ) បានចាត់ទុកថា “ធម្មនុញ្ញវិជ្ជាជីវៈសារ ព័ត៌មានកម្ពុជា” ពិតជាមានសារៈសំខាន់ និងមានប្រយោជន៍ណាស់ សម្រាប់អ្នកសារព័ត៌មានទាំងអស់គ្នា ដើម្បីពង្រឹង នូវការផលិតព័ត៌មានប្រកបដោយប្រសិទ្ធិភាពខ្ពស់ ដោយមិនប្រាសចាកពីក្រមសីលធម៌ និងវិជ្ជាជីវៈរបស់ខ្លួន ដែលជាហេតុ នាំឱ្យប៉ះពាល់ដល់ផលប្រយោជន៍សង្គម និងសិទ្ធិបុគ្គល។ជាថ្មីម្តងទៀតយើងខ្ញុំជាថ្នាក់ដឹកនាំ និងសមាជិក នៃសមាគមសារព័ត៌មាន អេឡិចត្រូនិច អ៊ឹម អេស ជេ (AEMSJ) សូមប្រកាសគាំទ្រចំពោះក្រសួងព័ត៌មានដែលបានបង្កើត ធម្មនុញ្ញវិជ្ជាជីវៈសារព័ត៌មានកម្ពុជា” នេះឡើង ដើម្បី ជាប្រយោជន៍សង្គម ផ្តល់នូវសិទ្ធិពេញលេញដល់អ្នកសារព័ត៌មានក្នុងការបំពេញការងាររបស់ខ្លួនក្នុងសង្គម ការផ្សព្វផ្សាយ ព័ត៌មានដែលមានតុល្យភាពប្រកបដោយគុណភាព និងការពិត មិនក្លែងបន្លំ ចូលរួមជំរុញឱ្យសង្គមឆ្ពោះទៅរកការរីកចម្រើន៕
