ខេត្តស្ទឹងត្រែង ៖ បុរសម្នាក់អះអាងខ្លួនកាន់ប័ណ្ណព័ត៌មានក្នុងស្រុកមួយ ត្រូវបានឃាត់ខ្លួនភ្លាមៗ ខណៈកម្លាំងកងរាជអាវុធហត្ថមួយក្រុម តាមប្រដេញបង្ក្រាបរថយន្តដឹកឈើគ្រញូងមួយគ្រឿងដែលធ្វើដំណើរចេញពីស្រុកសៀមប៉ាង ខេត្តស្ទឹងត្រែង ឆ្ពោះទៅស្រុកស្នួលខេត្តក្រចេះ ដោយស្ទាក់ចាប់បាននៅម៉ោងជាង២រសៀលថ្ងៃទី១២ វិច្ឆិកា នៅលើដងផ្លូវជាតិលេខ៧ ត្រង់ចំណុចមុខវត្តអូរព្រះ ស្ថិតក្នុងឃុំអូរព្រះ ស្រុកសំបូរ ខេត្តក្រចេះហើយការបង្ក្រាបបានរងការខូចខាតរថយន្តរបស់កម្លាំងអាវុធហត្ថចំនួន៣គ្រឿងផងដែរ។
ប្រភពព័ត៌មានបានឲ្យដឹងថា នៅមុនពេលកម្លាំងកងរាជអាវុធហត្ថចាប់បានរថយន្តដឹកឈើ និងឃាត់ខ្លួនបុរសខាងលើ គឺកម្លាំងសមត្ថកិច្ចបានប្រដេញចាប់រថយន្តនេះ ខណៈកំពុងធ្វើសកម្មភាព ដឹកជញ្ជូនឈើគ្រញូងចេញពីស្រុកសៀមប៉ាង ។ លុះមកដល់ស្នាក់ការសន្តិសុខអាវុធហត្ថដុងក្រឡ កម្លាំងអាវុធហត្ថបានប្រដេញចូលមកដល់ទីរួម ខេត្តហើយក៏មានការប៉ះទង្គិចទៅ លើរថយន្តអ្នកដំណើរផងដែរ។
ប្រភពបន្តថា សកម្មភាពនោះកម្លាំងកងរាជអាវុធហត្ថបន្តប្រដេញរហូតធ្លាក់ដល់ទឹកដីខេត្តក្រចេះទើបចាប់បានទាំងរថយន្ត និងអ្នកបើកបរតែម្តង។ សេចក្តីរាយការណ៍បានឲ្យដឹងថា រថយន្តដឹកឈើក្រញូង ដែលកម្លាំងកងរាជអាវុធហត្ថ បង្ក្រាបបានក្នុងពេលនោះ ជាប្រភេទ រថយន្តកាមរីឆ្លាម ព័ណ៌បៃតងចាស់ ពាក់ស្លាកលេខកំពង់ស្ពឺ 2A-2025 ។ ចំណែក អ្នកបើកបររថយន្ត ឈ្មោះ តាន សុភ័ក្ត្រ ជាជំនួយការនិពន្ធនាយក របស់អង្គភាពសារ ព័ត៌មានមួយក្នុងស្រុក រស់នៅស្រុកស្នួលខេត្តក្រចេះ។
ក្រោយការឃាត់ខ្លួនជនសង្ស័យ រួមជាមួយរថយន្តដឹកឈើគ្រញូង ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្តស្ទឹងត្រែង ។ ដោយឡែក ឈើក្រញូងនៅក្នុងរថយន្តនោះ នៅមិនទាន់ដឹងពីចំនួនពិតប្រាកដនៅឡើយទេ ចំពោះវត្ថុតាងបទល្មើស ត្រូវបានប្រគល់ទៅឲ្យមន្ត្រីព្រៃឈើខេត្តស្ទឹងត្រែង ដើម្បីកសាងសំណុំរឿង ចាត់ការតាមនីតិវិធីច្បាប់ ៕
