ភ្នំពេញ៖បើតាមរបាយការណ៍របស់សមត្ថកិច្ចខណ្ឌព្រែកព្នៅ បានឲ្យដឹងថា ប្រជាពលរដ្ឋបានប្រទះឃើញកាំភ្លើង និងគ្រាប់កាំភ្លើងនៅចំណុចមាត់បឹង ភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញនៅព្រឹកថ្ងៃទី៨ ខែវិច្ឆិកា ឆ្នាំ២០២០ ។
អាវុធទាំំងនោះរួមមាន៖ អាវុធវែងម៉ាកការ៉ាប៊ីន ចំនួន ០១ដើម, អាវុធវែង ម៉ាក M16 ចំនួន ០១ដើម, អាវុធខ្លីម៉ាក K៥៤ ចំនួន ០៣ដើម, អាវុធខ្លី ម៉ាក P08 ចំនួន ០២ដើម, បង់អាវុធ ម៉ាក K៥៤ ចំនួន ០៣បង់ មានគ្រាប់ចំនួន ១០៩គ្រាប់, បង់អាវុធ ម៉ាក M16 ចំនួន ០៣បង់ មានគ្រាប់ចំនួន ៦០គ្រាប់, បង់អាវុធ ម៉ាកការ៉ាប៊ីន ចំនួន ០២បង់ មានគ្រាប់ចំនួន ០៩គ្រាប់, ស្រោមអាវុធខ្លី ចំនួន ០១ដើម,កាំបិតខ្លីចំនួន ០១ដើម, ស្ព្រាយពណ៌ខ្មៅ ចំនួន ០១ដប, កេះដែលទំហំ ៣០សង់ទីម៉ែត្រ គុណ ៦០សង់ទីម៉ែត្រចំនួន ០១កេះ។
លោក សោម ភារម្យ និងលោក វី ពៅ ជាប្រជាពលរដ្ឋប្រទះឃើញអាវុធទាំងនេះ បានប្រាប់សមត្ថកិច្ចថា នៅថ្ងៃទី៨ ខែវិច្ឆិកា ឆ្នាំ២០២០ ម៉ោងប្រហែល ១១និង៣០នាទី បានធ្វើដំណើរពីផ្ទះទៅរកបេះបន្លែនៅមាត់បឹង ក្បែរកន្លែងកើតហេតុ ស្រាប់តែបានប្រទះឃើញកេះដែកបិតមាត់ជិត ហើយបានយកដៃទៅទាញបង្ហើបមើលឃើញកាំភ្លើងជាច្រើន ក៏រាយការណ៍ជូនសមត្ថកិច្ចនគរបាលប៉ុស្តិ៍ព្រែកព្នៅ។
ក្រោយពីបានទទួលព័ត៌មានពីប្រជាពលរដ្ឋ កម្លាំងសមត្ថកិច្ច បានចុះធ្វើការស្រាជ្រាវដល់កន្លែងកើតហេតុ និងយកកាំភ្លើងទាំងនេះ មករក្សាទុកនៅប៉ុស្តិ៍នគរបាលរដ្ឋបាលព្រែកព្នៅ ដើម្បីស្រាវជ្រាវរកជនល្មើស៕ដោយ៖ ទូច រ៉ាវុធ
