(បាត់ដំបង): ហេតុការណ៍ភ្ញាក់ផ្អើលប្រទះឃើញសាកសពប្តីប្រពន្ធពីរនាក់ខាងលើនេះបានកើតឡើងនៅវេលាម៉ោង១១និង៣០នាទី ថ្ងៃទី០៧ ខែឧសភា ឆ្នាំ២០២៣ នៅចំណុចទីតាំងផ្ទះរបស់ជនរងគ្រោះ ស្ថិតក្នុងភូមិកំពង់ពិល ឃុំវត្តតាមិម ស្រុកសង្កែ ខេត្តបាត់ដំបង ដែលសាកសពជាប្តីឈ្មោះ សូ សំអឿន អាយុ ៧៦ឆ្នាំ និងប្រពន្ធឈ្មោះ អិត លឿន អាយុ ៦៦ឆ្នាំ។តាមការបញ្ជាក់ពីកូនស្រីរបស់សព ឈ្មោះ ចាន់ ធូ អាយុ៤២ឆ្នាំ បានអោយដឹងថា ចាប់តាំងពីអំឡុងចូលឆ្នាំហើយ ពួកគាត់ជាកូនៗមិនសូវដែលបានមកលេងផ្ទះឪពុកម្តាយទេដោយរវល់ការងាររកស៊ីរៀងខ្លួន ហើយគាត់នៅតែពីរនាក់ប្តីប្រពន្ធ ដោយប្តីមើលថែប្រពន្ធដែលមានជំងឺរ៉ាំរ៉ៃដេកនៅលើគ្រែ។

ប្រភពដដែលបានបន្តថា នៅមុនថ្ងៃកើតហេតុប៉ុន្មានថ្ងៃ ខ្លួនបានទូរស័ព្ទមកឪពុកម្តាយដែរតែទាក់ទងមិនបានក៏ហីៗទៅ លុះដល់ព្រឹកថ្ងៃកើតហេតុប្អូនប្រុសរបស់ខ្លួនបានមកមើលក៏ប្រទះឃើញពួកគាត់ដេកស្លាប់ទាំងពីរនាក់ក្នុងសភាពហើមស្អុយទៅហើយ បន្ទាប់មកក៏រាយការណ៍ជូនសមត្ថកិច្ចតែម្តង។

ក្រោយកើតហេតុសមត្ថកិច្ចជំនាញនិងក្រុមគ្រូពេទ្យបានចុះទៅពិនិត្យកោសល្យវិច័យ និងបានសន្និដ្ឋានថា សាកសពជាប្តីស្លាប់ដោយសារគាំងបេះដូង ចំណែកប្រពន្ធដោយសារគាត់មានជំងឺរ៉ាំរ៉ៃដេកនិងកន្ទេលដើរទៅណាមិនរួចដោយប្តីស្លាប់មុន គួបផ្សំជាមួយអាកាសធាតុក្តៅផងនោះប្រពន្ធក៏ស្លាប់ទៅតាមក្រោយដោយដាច់អាហារនិងទឹក ។