ភ្នំពេញ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឱ្យដឹងនៅរសៀលថ្ងៃទី៨ ខែវិច្ឆិកា ឆ្នាំ២០២០នេះថា ស្ថានភាពសុខភាពបុរសជាអង្គរក្សការពារផ្ទាល់ឯកឧត្តមរដ្ឋមន្ត្រីការបរទេសហុងគ្រី ត្រូវបានរកឃើញថា វិជ្ជមានវីរុសកូវីដ-១៩ ស្ថិតក្នុងភាពល្អប្រសើរ។
លោកជំទាវ បានគូសបញ្ជាក់ថា ៖ “ខ្ញុំសូមបញ្ជាក់ជូនថា ក្រុមការងារកំពុងធ្វើការ។ គ្រាន់តែសូមបញ្ជាក់ថា សុខភាពអ្នកជំងឺនៅពេលនេះ មិនមានសញ្ញាណាមួយដែលបង្ហាញពីសភាពធ្ងន់ធ្ងរនោះទេ។ បច្ចុប្បន្ន គាត់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត”។
បន្ទាប់មានការផ្សាយនូវសារសំឡេងមួយដែលលើកឡើងថា តៃកុងឡានដែលបើកបរឲ្យរដ្ឋមន្ត្រីការបរទេសហុងគ្រី មានលទ្ធផលតេស្តវិជ្ជមានកូវីដ១៩ដែរនោះ ត្រូវបានលោកជំទាវអ្នកនាំពាក្យ បានបញ្ជាក់ថា “ក្រសួងមិនទាន់ទទួលបានលទ្ធផលវិភាគនៅឡើយទេ។ សុំរង់ចាំការចេញផ្សាយរបស់រដ្ឋាភិបាល ឬរបស់ក្រសួងសុខាភិបាល ប្រសិនបើមានការវិវត្តយ៉ាងណានោះ ហើយសុំមេត្តាកុំចែកចាយសារសំឡេងនេះអីណា ដែលមិនទាន់មានលទ្ធផលច្បាស់លាស់ផង”។
លោកជំទាវបញ្ជាក់យ៉ាងខ្លីថា “ខ្ញុំស្នើសុំសាមីខ្លួន លុបការផ្សាយរបស់ខ្លួនទាំងអស់ជាបន្ទាន់ផងដែរណា ដើម្បីកុំឲ្យមានការយល់ច្រឡំ”។
លោកជំទាវ បានបន្ថែមថា ដោយឡែករាល់អ្នកដែលបានប៉ះពាល់ផ្ទាល់ និងប្រយោល ជាមួយបុរសរូបនេះ ខាងក្រសួងសុខាភិបាល បាន និងកំពុងតែធ្វើការងារនេះផងដែរ ហើយលោកជំទាវក៏បានស្នើឱ្យអ្នកដែលបានប៉ះពាល់ដោយផ្ទាល់ ឬប្រយោល ជាមួយនឹងអ្នកដែលបានបម្រើការងារក្នុងឱកាសដំណើរទស្សនកិច្ចរបស់ ឯកឧត្តមរដ្ឋមន្ត្រីការបរទេសហុងគ្រី សូមទៅធ្វើតេស្តនៅមណ្ឌលសុខភាពចាក់អង្រែក្រោម ដើម្បីចៀសវៀងការព្រួយបារម្ភ និងសង្ស័យអំពីស្ថានភាពសុខភាពរបស់ខ្លួន។
គួររម្លឹកថា កាលពីថ្ងៃទី០៧ ខែវិច្ឆិកា ឆ្នាំ២០២០ ម្សិលមិញនេះ មានការភ្ញាក់ផ្អើល ហើយក៏ជាលើកទី១ ដែលកម្ពុជារកឃើញអ្នកវិជ្ជមានវីរុសកូវីដ-១៩ ក្នុងចំណោមអ្នកដែលបានធ្វើតេស្តប្រមាណជាង ៩០០នាក់ ដែលបានប៉ះពាល់ដោយផ្ទាល់ និងប្រយោល ជាមួយគណៈប្រតិភូហុងគ្រី ដែលបានមកបំពេញទស្សនកិច្ចផ្លូវការនៅកម្ពុជា កាលពីថ្ងៃទី០៣ ខែវិច្ឆិកា កន្លងមក៕
