ខេត្តកំពង់ឆ្នាំង ៖ បុរសម្នាក់ ជាអ្នកបើកបររថយន្តម៉ាក MONING បានស្លាប់ភ្លាមៗ ខណៈបើកបរមិនបានមើលពីស្ថានភាពគ្រោះថ្នាក់នៅខាងមុខ បានបុកជាមួយរថយន្ត ដឹកទំនិញធុនធ្ងន់មួយគ្រឿង ដែលឈប់ចតសកងៀមនៅលើផ្លូវ ហើយគ្មានដាកើភ្លងបំភ្លឺ ឬ សញ្ញាសម្គាល់ឲ្យយានយន្តផ្សេងៗបានដឹង ។
ហេតុការណ៍គ្រោះថ្នាក់នេះ បានកើតឡើងកាលពីយប់ ថ្ងៃសៅរ៍ ទី៨ ខែសីហា ឆ្នាំ២០២០ វេលាម៉ោង ២៣និង៣០ នាទី លើកំណាត់ផ្លូវជាតិលេខប្រាំ ចន្លោះគីឡូម៉ែត្រលេខ 86-87 ស្ថិតនៅភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង មានករណីគ្រោះថ្នាក់ចរាចរណ៍ ដោយរថយន្តម៉ាក MONING ពណ៌ស ពាក់ផ្លាកលេខ កំពង់ឆ្នាំង 2B-3546 បើកបរដោយឈ្មោះ មាស ច័ន្ទដារ៉ា ភេទ ប្រុស អាយុ ៣២ ឆ្នាំ សញ្ជាតិខែ្មរ មានទីលំនៅបច្ចុប្បន្នភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង បើកបរចេញពីទិសខាងជើង ទៅទិសខាងត្បូង ។
លុះបើកបរមកដល់ចំណុចខាងលើ ក៏បានបុកជាមួយរថយន្តម៉ាក ASIA GRANTO ពណ៌ស ពាក់ស្លាកលេខ ភ្នំពេញ 3A-8833 និងសឺមីរ៉ឺម៉ក ពណ៌ទឹកប៊ិច ពាក់ផ្លាកលេខ ភ្នំពេញ 4A-0852 ដែលជារថយន្តរបស់ក្រុមហ៊ុនដឹកជញ្ជូន អក្សរ DN (មិនស្គាល់អ្នកបើកបរ និងអាស័យដ្ឋាន រត់គេចខ្លួនបាត់) ដែលកំពុងចតឈប់ នៅជាប់ចិញ្ចើមផ្លូវ (មេឃកំពុងភ្លៀង) ពីទិសខាងត្បូង ទៅទិសខាងជើង ក្នុងដំណើរច្រាស់ទិសគ្នា បណ្តាលឲ្យស្លាប់ ០១ នាក់ប្រុស (អ្នកបើកបររថយន្តម៉ាក MONING) ។នៅកន្លែងកើតហេតុ ខូចខាតរថយន្ត ២ គ្រឿង ធ្ងន់ ១ គ្រឿង ត្រូវបានចាប់យកមករក្សាទុកនៅអធិការដ្ឋានគរបាលក្រុងកំពង់ឆ្នាំង ដើម្បីកសាងសំណុំរឿងទៅតាម នីតិវិធីច្បាប់ ។ មូលហេតុ ឈប់ ចត ដោយគ្មានភ្លើងបំភ្លឺ ឬគ្មានសញ្ញាសម្រាប់ឲ្យយានដទៃបានដឹង ៕
