មន្ត្រីជាន់ខ្ពស់នៃក្រសួងបរិស្ថាន លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានថ្លែងថាៈ នៅថ្ងៃទី១១ ខែសីហា ឆ្នាំ២០២២ នេះ មន្ត្រីក្នុងដែនជម្រកសត្វព្រៃ ព្រៃឡង់ ចុះបង្ក្រាបបទល្មើសជួញដូរ លក់សាច់សត្វព្រៃ នៅក្នុងផ្សារសាមគ្គី ក្រុងស្ទឹងត្រែង ខេត្តស្ទឹងត្រែង។បើតាមលោករដ្ឋលេខាធិការ បានឱ្យដឹងថាៈ ក្នុងការចុះបង្ក្រាបនេះដែរ ជាលទ្ធផល ក្រុមការងារបង្ក្រាប បានរកឃើញមានដូចជា សាច់ជ្រូកព្រៃ ចំនួន១១គីឡូក្រាម, សាច់ឈ្លូស ចំនួន ៥គីឡូក្រាម, សាច់ប្រម៉ា ចំនួន ២គីឡូក្រាម , ជញ្ជីង១, កាំបិតប៉័ងតោ ចំនួន២ , កញ្ច្រែង ២, ជ្រុញ ១ និងសត្វអាញី (ងាប់) ចំនួន ១ក្បាល សរុបសាច់សត្វ មានចំនួន ១៨ គីឡូក្រាម ។លោក នេត្រ ភក្ត្រា បានថ្លែងឱ្យដឹងដែរថាៈ ក្រោយការបង្ក្រាបនេះ ក្រុមការងារ បានយកទៅដុតបំផ្លាញចោល។ ចំណែកឯម្ចាស់សាច់សត្វព្រៃ បានរត់គេចខ្លួនអស់ បន្សល់ទុកតែវត្ថុតាង នៅកន្លែងកើតហេតុ៕
