អាគារទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ សាងសង់ថ្មីរួច នៅកោះព្រាបក្នុងខេត្តព្រះសីហនុ​ សម្ពោធដាក់ឲ្យដំណើរការជាផ្លូវការ​

សីហនុ៖​ ព្រឹកថ្ងៃទី២០​ ខែមីនា​ ឆ្នាំ២០២២​ អគារទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ដែលទើបសាងសង់ថ្មីរួច នៅក្នុងបរិវេណតំបន់កោះព្រាបស្ថិតក្នុងសង្កាត់លេខ ១ ក្រុងព្រះសីហនុត្រូវបានសម្ពោធដាក់ឲ្យដំណើរការជាផ្លូវការនៅព្រឹកថ្ងៃទី២០ខែមីនា២០២២ ក្រោមអធិបតីភាពដ៏ខ្ពង់ខ្ពស់របស់សម្តេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។ឯកឧត្តម ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រមានប្រសាសន៍ថា ទីបញ្ជាការជួរមុខដាក់សម្ពោធឱ្យប្រើប្រាស់នាពេលនេះមានចំនួន ៣ ខ្នងរួមមានអាគារទីបញ្ជាការមួយខ្នងកម្ពស់បីជាន់អាគាររោងជាងមួយខ្នងនិងអគារស្នាក់នៅអាហារដ្ឋានមួយខ្នងរួមជាមួយនឹងសមិទ្ធផលជាច្រើន។ បានស្ថាបនារួចរាល់នៅក្នុងបរិវេណទីបញ្ជាការ ហើយសមិទ្ធិផលសម្រេចបានទាំងអស់នេះគឺក្រោមការយកចិត្តទុកដាក់ពីរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែនជាប្រមុខដឹកនាំបានធ្វើឱ្យប្រទេសកម្ពុជាមានសុខសន្តិភាពស្ថេរភាពនយោបាយពេញលេញទូទាំងប្រទេសនិងមានការអភិវឌ្ឍន៍លើគ្រប់វិស័យ។ឯកឧត្តម ឧត្តមនាវីឯក ទៀ សុខា មានប្រសាសន៍បន្ថែមថា បច្ចុប្បន្នកម្លាំងចំរុះរបស់ទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ បាននិងកំពុងធ្វើសកម្មភាព ចូលរួមទប់ស្កាត់បទល្មើសផ្សេងៗក្នងដែនសមុទ្រកម្ពុជា មានដូចជាការបង្ក្រាបបទល្មើសនេសាទការជួញដូរទំនិញគេចពន្ធការឆ្លងកាត់និងចរាចរគ្រឿងញៀនខុសច្បាប់ហើយសកម្មភាពទាំងអស់នេះវាបានបង្កផលអវិជ្ជមានដល់ការអភិវឌ្ឍសេដ្ឋកិច្ចនិងសង្គមជាតិ និងបានធ្វើសកម្មភាពចូលរួមក្នុងការអភិរក្ស័ ការពារធនធាន ជីវៈចំរុះធម្មជាតិបាតសមុទ្រ ទុកជាប្រយោជន៍សង្គមនិងជាប្រយោជន៍សាធារណៈ។សម្តេចពិជយ័សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានកោតសរសើរ និងវាយតម្លៃខ្ពស់ចំពោះកងកម្លាំងសមត្ថកិច្ចចំរុះ នៅទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ដែលសហការជាមួយសមត្ថកិច្ចពាក់ពន្ធ័ រួមទាំងអាជ្ញាធរដែនដី របស់គណបញ្ជាការឯកភាពរដ្ឋបាលខេត្តតំបន់ឆ្នេរទាំង៤ មានខេត្តព្រះសីហនុ ខេត្តកំពត ខេត្តកែបនិងខេត្តកោះកុង ធ្វើប្រតិបត្តិការទប់ស្កាត់និងបង្ក្រាបបានបទល្មើសជាបន្តបន្ទាប់ដូចជាបទល្មើសគ្រឿងញៀន បទល្មើសនេសាទនិងបទល្មើសឆ្លងដែនខុសច្បាប់ជាដើម។ល។សម្តេចពិជយ័សេនាទៀ បាញ់ បានលើកទឹកចិត្តនិងជំរុញឲ្យកម្លាំងចំរុះទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ យកចិត្តទុកដាក់ធ្វើប្រតិបត្តិការបន្តទៀត ជាពិសេសគឺប្រឆាំងទប់ស្កាត់គ្រប់សកម្មភាព ភេរវកម្មគ្រប់រូបភាពលើដែនសមុទ្រកម្ពុជាបន្ថែមទៀតដើម្បីធ្វើយ៉ាងណាឱ្យអធិបតេយ្យដែនសមុទ្រកម្ពុជារបស់យើងមានសុខសុវត្ថិភាពជូនជាតិមាតុភូមិនិងប្រជាពលរដ្ឋរបស់យើង៕