ភ្នំពេញ៖ មហាជនអ្នកលេងបណ្តាញសង្គមបា្រកដជាធ្លាប់បានស្គាល់ហើយ ក្មេងស្រីតូចម្នាក់ឈ្មោះ ណាណា ទាំងឆ្លាតស្អាតគួរឲ្យស្រលាញ់ថែមទាំងពូកែនិយាយពេលនេះបានធ្វើឲ្យអ្នកលេងបណ្តាញ សង្គមចាប់អារម្មណ៍ជាខ្លាំងតាមរយៈពាក្យសម្តីដ៏មានខ្លឹមសារ និងសម្លេងពិរោះដែលបានសម្តែងពីអារម្មណ៍របស់ខ្លួននៅក្នុងវីដេអូឃ្លីមមួយប្រមាណជាង២នាទី ដែលបានបង្ហោះនៅថ្ងៃទី២៦ ខែកក្កដា ឆ្នាំ២០២១នេះ ជុំវិញការចាក់វ៉ាក់សាំងនៅកម្ពុជា ។
បើតាមណាណាខ្ជូត(cute)បានលើកឡើងថា ណាណាចង់ចាក់វ៉ាក់សាំងការពារជំងឺកូវីដ-១៩ខ្លាំងណាស់ មូលហេតុដោយសារក្មេងស្រីរូបនេះសង្កេតឃើញមានអ្នកឆ្លងជំងឺកូវីដ-១៩ជាបន្តបន្ទាប់ ។ ម្យ៉ាងទៀតណាណាតែងនៅលក់ដូរជាមួយម៉ាក់របស់ណាណាផងដែលធ្វើឲ្យក្មេងស្រីតូចនេះកាន់តែព្រួយបារម្ភខ្លាំងចំពោះការឆ្លងវីរុសនេះទាំងមិនដឹងខ្លួន ។ ប៉ុន្តែទោះបីយ៉ាងណាក្តីណាសោកស្តាយដោយសារមិនទាន់គ្រប់អាយុសម្រាប់ចាក់នៅឡើយ ។ ក្រៅពីនេះណាណាក៏បានលើកអំពីបញ្ហាមួយចំនួនទៀតជុំវិញការចាក់វ៉ាក់សាំងនៅកម្ពុជាផងដែរ ។
បន្ទាប់ពីឃើញសារនេះភ្លាមបូករួមជាមួយនឹងភាពប៉ិនប្រសព្វរបស់របស់ណាណាផងពិតជាបានធ្វើឲ្យមហាជនលួចខ្នាញ់ចង់ប៉ិចថ្ពាល់ណាណាមិនតិចនោះទេ ។ មិនតែប៉ុណ្ណោះគេក៏សង្កេតឃើញមានមហាជនជាច្រើនចូលស៊ែរខាំម៉ិនបញ្ចេញមតិរបស់ខ្លួនចំពោះវីដេអូនខ្លីរបស់ណាណានេះ ។
អ្វីដែលកាន់តែធ្វើឲ្យគេចាប់អារម្មណ៍ខ្លាំងថែមទៀតនោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានយកវីដេអូរបស់ណាណាយកមកបង្ហោះនៅក្នុងផេកហ្វេសប៊ុករបស់របស់សម្តេចថែមទៀតផង ដោយរំលេចសាថា«សូមស្ដាប់ចៅ ណាណា និយាយ អំពីបំណងចង់ចាក់វ៉ាក់សាំងការពារកូវីដ-១៩» ៕
