ភ្នំពេញ ៖ មនុស្សប្រុស.ស្រីចំនួន៩នាក់ ក្នុងចំណោម១០១នាក់ ត្រូវកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញចាប់ខ្លួន ក្នុងការចុះបង្ក្រាបខារ៉ាអូខេសង្ស័យបង្កប់ដោយសេវាបម្រើថ្នាំញៀនក្រោមភ្លើងពណ៌ចម្រុះគ្នា កាលពីសប្តាហ៍មុន ។
មន្ត្រីនគរបាលព្រហ្មទណ្ឌកំរិតស្រាលនៅពីព្រឹកថ្ងៃទី៣១ខែសីហា ឆ្នាំ២០២០នេះ បានធ្វើការបញ្ជូនខ្លួនជនសង្ស័យ ចិន ខ្មែរ វៀតណាម ៩នាក់ទៅអយ្យការអមតុលាការក្រុងភ្នំពេញ ដើម្បីធ្វើការសាកសួរពាក់ព័ន្ធករណី បង្ក្រាបការជួញដូរ ចាត់ចែង និងសម្រួលឲ្យប្រើប្រាស់នូវសារធាតុញៀន និងសមគំនិត ប្រព្រឹត្តក្នុងខារ៉ាអូខេ Go ១៨ ស្ថិតនៅសង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ។ ពេលនេះជនសង្ស័យចម្រុះជាតិសាសន៍កំពុងស្ថិតនៅក្នុងដៃតំណាងអយ្យការសាកសួរ។
យោងតាមសមត្ថកិច្ខខណ្ឌទួលគោក បានឲ្យដឹងថា ជនសង្ស័យរួមមាន១. យ៉ាង ហ្វីស្យុង(HUANG FEI XIONG)ភេទប្រុស អាយុ៣០ឆ្នាំ(ចិន) មុខរបរជាបុគ្គលិកផ្នែកគណនេយ្យក្លឹប១៣ KTV ស្នាក់នៅខុនដូអូឡាំព្យាអគារC១សង្កាត់វាលវង់ ខណ្ឌ៧មករា ។ ២.យ៉ាង ហ្វីយ៉ាវ(HUANG FEI HAO) ភេទប្រុស អាយុ២៣ ឆ្នាំ(ចិន) មុខរបរជាបុគ្គលិកផ្នែកគណនេយ្យក្លឹប១៣KTV ស្នាក់នៅសង្កាត់ផ្សារដេប៉ូ១ ខណ្ឌទួលគោក។ ៣.លីន កាងឡៃ(LIN KANG LAI) ភេទប្រុស អាយុ៤៧ឆ្នាំ(ចិន) មុខរបរបុគ្គលិកផ្នែកសេវាកម្មក្លឹប១៣ KTV ស្នាក់នៅសង្កាត់ផ្សារដេប៉ូ១ ខណ្ឌទួលគោក ។
៤.ហ្សាង ជិន វៃ(ZHANG JIN WEI) ភេទប្រុស អាយុ៣០ឆ្នាំ(ចិន) មុខរបរបុគ្គលិកផ្នែកសេវាកម្មក្លឹប១៣KTV ស្នាក់នៅខុនដូ សង្កាត់កាកាប១ ខណ្ឌពោធិ៍សែនជ័យ ។ ៥. វី សាលបុត្រ ភេទប្រុស អាយុ៤១ឆ្នាំ(ខ្មែរ) មុខរបរ ប្រធានសន្តិសុខ ស្នាក់នៅផ្ទះគ្មានលេខ ផ្លូវបេតុង ភូមិសន្សំកុសល១ សង្កាត់បឹងទំពុន ខណ្ឌមានជ័យនិង៦ .NGOC GIAU (ង៉ុក យ៉ាវ) ភេទស្រី អាយុ២០ឆ្នាំ (វៀតណាម) មុខរបរ នៅផ្ទះស្នាក់នៅខុនដូ សង្កាត់ទន្លេបាសាក់ ខណ្ឌចំការមន ។ ៧.យ៉ាយ វុធថា ភេទប្រុស អាយុ៣៤ឆ្នាំ(ខ្មែរ) មុខរបរ បើកបររថយន្ត ស្នាក់នៅផ្ទះគ្មានលេខ ផ្លូវលំ ឃុំគគីរ ស្រុកកៀនស្វាយ ខេត្តកណ្តាល ។ ៨. សៅ សុខគា ភេទប្រុស អាយុ១៩ឆ្នាំ(ខ្មែរ) មុខរបរ សន្តិសុខ ស្នាក់នៅក្លឹប១៣KTV សង្កាត់ផ្សារដេប៉ូ១ ខណ្ឌទួលគោក និង៩.ទិត្យ ចាន់កក្កដា ភេទប្រុស អាយុ២២ឆ្នាំ(ខ្មែរ) មុខរបរសន្តិសុខ ស្នាក់នៅក្លឹប១៣KTV សង្កាត់ផ្សារដេប៉ូ១ ខណ្ឌទួលគោក ។
ក្នុងប្រតិបត្តិការនេះ សមត្ថកិច្ចចាប់យកវត្ថុតាងរួមមាន៖ ១.ដបថ្នាំទឹកម៉ាកHeneken ចំនួន១៩ ដប សង្ស័យសារធាតុញៀន ។ ២.ដបថ្នាំពណ៌ផ្កាឈូក១៤ ដប និងដបថ្នាំទឹកម៉ាក Rel deil ១ដប។ ៣.ម្សៅក្រាមសថ្លា ២៧ កញ្ចប់តូច ។ ៤.ថ្នាំគ្រាប់ពណ៌ បៃតង ២៣ កញ្ចប់តូច។ ៥.ដបថ្នាំចម្រុះពណ៌ មានអក្សរចិន ៦៣ ដប។ ៦.ម្សៅកញ្ចប់ម៉ាក Sidomuucul binary stawlna ពណ៌បៃតង ១៦កញ្ចប់តូច ។ ៧.ម្សៅកញ្ចប់ពណ៌តែ២០ កញ្ចប់តូច ។ ៨.ម្សៅកញ្ចប់រូបផ្លែឈើ១០ កញ្ចប់។ ៩.កញ្ចប់រូបផ្លែប៉ោមពណ៌ខៀវ ៦កញ្ចប់ ។ ១០.ថ្នាំគ្រាប់ពណ៌ក្បឿង ៥គ្រាប់ ។
គួរបញ្ជាក់ថា យុទ្ធនាការរបង្ក្រាប(ខារ៉ាអូខេ)ទ្រង់ទ្រាយធំនេះ ធ្វើឡើងកាលពីវេលាម៉ោង១ និង១៥ នាទីរំលងអធ្រាត្រឈានចូលថ្ងៃទី២៦ ខែសីហា ឆ្នាំ២០២០២ កម្លាំងសមត្ថកិច្ចនគរបាលការិយាល័យព្រហ្មទណ្ឌ កំរិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយនឹងកម្លាំងអន្តរាគមន៍ពិសេស បានធ្វើការឆ្មក់ចូលទៅបង្ក្រាបទីតាំង ខារ៉ាអូខេ Go១៨ ខាងលើ ខណៈនោះមនុស្សប្រុស ស្រីចូលទៅប្រើប្រាស់ថ្នាំក្រវី និងជួញដូរគ្រឿងញៀនជាច្រើននាក់ ស្ថិតនៅតាមបណ្តោយផ្លូវ ២០៦ កែងនឹងផ្លូវ ២១៩ នៅម្តុំផ្សារដេប៉ូ ស្ថិតក្នុងសង្កាត់ផ្សារដេប៉ូ ១ ខណ្ឌទួលគោក រាជធានីភ្នំពេញ ។ ក្នុងប្រតិបត្តការនោះសមត្ថកិច្ចបានធ្វើការឃាត់ខ្លួនមនុស្សរហូតដល់ទៅ១០១ នាក់ មាន ចិន ខ្មែរ និងវៀតណាម ប៉ុន្តែជាក់ស្តែងមានតែមនុស្ស៩ នាក់ទេ ដែលរកឃើញថាជាប់ពាក់ព័ន្ធបទល្មើសគ្រឿងញៀន ៕
