ភ្នំពេញ ៖ ជនសង្ស័យ២នាក់ ពាក់ព័ន្ធករណី ប្លន់សម្លាប់បុរសម្នាក់ យកទ្រព្យសម្បត្តិ កាលពីថ្ងៃទី១១ ខែមីនា ឆ្នាំ២០២១ ម្ដុំផ្លូវជាតិលេខ១ ខណ្ឌច្បារអំពៅ ឥឡូវសមត្ថកិច្ចស្រាវជ្រាវ ចាប់បានហើយជាបន្តបន្ទាប់ ម្នាក់ចាប់បាននៅភ្នំពេញ ម្នាក់ទៀតចាប់បាន នៅស្រុកគីរីវង់ ខេត្តតាកែវ នារសៀលថ្ងៃទី១៦ ខែមីនា ឆ្នាំ២០២១ ។
ជនសង្ស័យទាំង២នាក់ ទី១ឈ្មោះ ម៉ៅ រដ្ឋា ហៅជិប ភេទប្រុស ជាជន….ឃាត់ខ្លួនបាន នៅតាមបណ្តោយផ្លូវជាតិលេខ១ មុខមណ្ឌលសុខភាព ព្រែកឯង សង្កាត់ព្រែកឯង ខណ្ឌច្បារអំពៅ និងទី២-ឈ្មោះ ម៉េង ណាឃីម ភេទប្រុស អាយុ ២១ឆ្នាំ ជាអ្នក…….. ឃាត់ខ្លួនបាននៅស្រុងគិរីវង់ ខេត្តតាកែវ រីឯជនរងគ្រោះមានឈ្មោះ សោ សៅពិសិដ្ឋ ភេទប្រុស អាយុ……។
សមត្ថកិច្ចឱ្យដឹងថា ក្រុមជនសង្ស័យសារភាពថា នៅថ្ងៃកើតហេតុ ពួកគេបានរៀបគម្រោង និងបបួលជនរងគ្រោះមកហូបអីជុំគ្នា នៅកោះពេជ្រ ដោយស្ថានភាពមិនប្រក្រតី ក៏បានបំបែកគ្នាទៅផ្ទះវិញរៀងៗខ្លួន ។ បន្ទាប់មក ពួកគេបានហៅជនរងគ្រោះមកក្រៅម្ដងទៀត មកម្ដុំផ្លូវជាតិលេខ១ លុះមកដល់ចំណុចងងឹត ក៏បានធ្វើសកម្មភាពអា.ក សម្លាប់ជនរងគ្រោះតែម្ដង។ ក្រោយធ្វេីសកម្មភាពរួច ពួកខ្លួន បានចែកទ្រព្យសម្បត្តិគ្នា ក្នុងនោះឈ្មោះ ម៉ៅ រដ្ឋា យកចិញ្ជៀនមាស និងខ្សែរ.ក ចំណែកឯឈ្មោះ ម៉េង ណាឃីម យកម៉ូតូ, ទូរស័ព្ទដៃ និងខ្សែដៃ រួចនាំគ្នាគេចខ្លួន ។
បច្ចុប្បន្នកម្លាំងជំនាញ នៃនាយកដ្ឋាននគរបាលព្រហ្មទណ្ឌ កំពុងសាកសួរ និងរៀបចំឯកសារ ប្រគល់ជនសង្ស័យ និងវត្ថុតាងឲ្យទៅ អធិការដ្ឋាន នគរបាលខណ្ឌច្បារអំពៅ ដើម្បីចាត់ការ ទៅតាមនីតិវិធី និងត្រៀមបញ្ជូន ទៅសាលាដំបូងរាជធានីភ្នំពេញ ។
សូមជម្រាបថា ប្រតិបត្តិការនេះធ្វើឡើង ក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ, លោកឧត្តមសេនីយ៍ឯក អ៉ិន បូរ៉ា អគ្គស្នងការរងនគរបាលជាតិ និងមានការចង្អុលបង្ហាញពី លោកឧត្តមសេនីយ៍ឯក ង៉េង ជួ ប្រធាននាយកដ្ឋាន នគរបាលព្រហ្មទណ្ឌ ដែលមានការ សម្របសម្រួលនីតិវិធី ដោយព្រះរាជអាជ្ញា នៃអយ្យការ អមសាលាដំបូងរាជធានីភ្នំពេញ
ដោយកម្លាំង នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ សហការជាមួយ ការិយាល័យ នគរបាលព្រហ្មទណ្ឌកម្រិតធ្ងន់ នៃស្នងការដ្ឋាន នគរបាលរាជធានីភ្នំពេញ, អធិការដ្ឋាន នគរបាលខណ្ឌច្បារអំពៅ និងកម្លាំងស្នងការដ្ឋាន នគរបាលខេត្តតាកែវ ៕ ដោយ ៖ទូច រ៉ាវុធ
