កំពង់ឆ្នាំង ៖ រថយន្តសាំយ៉ុងដឹកថ្នាំលាប U90មួយគ្រឿង ឆ្លងចរន្តភ្លើងឆាបឆេះខ្ទេចទាំងស្រុង កាលពីវេលាម៉ោង៥៖៣០នាទីព្រឹក ថ្ងៃទី៣០ ខែធ្នូ ឆ្នាំ២០២០នេះ នៅចំណុចមុខផ្សារពន្លៃ តាមបណ្ដោយផ្លូវជាតិលេខ៥ ចន្លោះគីឡូម៉ែត្រលេខ១២៣-១២៤ ស្ថិតក្នុងភូមិពន្លៃ ឃុំពន្លៃ ស្រុកបរិបូណ៍ ខេត្តកំពង់ឆ្នាំង។
នគរបាលស្រុកបរិបូណ៌ បានឲ្យដឹងថា រថយន្តសាំយ៉ុងដែលត្រូវអគ្គិភ័យឆេះខ្ទេចទាំងស្រុងនេះ ពាក់ស្លាកលេខ ភ្នំពេញ 2AA-0144 បើកបរដោយបុរសម្នាក់ ឈ្មោះ ទិត្យ ហេង អាយុ ៣០ឆ្នាំ ទីលំនៅភូមិអង្គស្នាយខាងជើង ស្រុកអង្គរជ័យ ខេត្តកំពត។
ប្រភពដដែលបានបន្តថា មុនពេលកើតហេតុ រថយន្តខាងលើបានដឹកទំនិញមកដល់កន្លែងកើតហេតុ ស្រាប់តែមានអណ្តាតភ្លើងឆេះចេញពីក្នុងរថយន្ត ហើយម្ចាស់ក៏បានឈប់អែបខាង រួចស្ទុះចេញមកខាងក្រៅ បន្ទាប់មកអណ្ដាតភ្លើងបានឆេះយ៉ាងសន្ឋោសន្ឋៅ បណ្ដាលឲ្យខ្ទេចទាំងស្រុង រួមទាំងសម្ភារៈផងដែរ។ ចំពោះការខូចខាត គឺរថយន្តសាំយ៉ុង ១គ្រឿង ថ្នាំលាបU90 ជាច្រើនធុង ល្បាយទឹកក្រូច និងសម្ភារៈជាច្រើនទៀត ដែលប្រមាណទឹកប្រាក់ មានចំនួនជាង២ម៉ឺនដុល្លារ។
សមត្ថកិច្ចបានបញ្ជាក់ថា មូលហេតុដែលបណ្ដាលឱ្យមានការឆាបឆេះនេះ សង្ស័យបណ្ដាលមកពីឆ្លងប្រព័ន្ធភ្លើងរថយន្ត។
ក្នុងករណីនេះដែរ គេឃើញរថយន្តពន្លត់អគ្គិភ័យ របស់អធិការនគរបាលស្រុកបរិបូរណ៍ ចេញអន្តរាគមន៍ពន្លត់ដែរ ប៉ុន្តែភ្លើងបានឆេះរថយន្តអស់ទៅហើយ។ យ៉ាងនេះក្តីពុំមាននរណា រងរបួសក្នុងហេតុការណ៍ខាងលើនេះទេ៕
