បាត់ដំបង៖ ដូចដែលបងប្អូនបានជ្រាបហើយ ខណៈពេលនេះ តំបន់ជាច្រើននៅក្នុងខេត្តបាត់ដំបង បាននិងកំពុងត្រូវលិចលង់ដោយសារជំនន់ទឹកភ្លៀងយ៉ាងគំហុក អស់រយៈពេលជាច្រើនថ្ងៃជាប់ៗគ្នាមកនេះ ដែលជាហេតុធ្វើឲ្យបងប្អូនប្រជាពលរដ្ឋជាច្រើន ត្រូវបានជម្លៀសទៅកាន់ទីកន្លែងមានសុវត្ថិភាព។
ពិតមែនហើយ ស្របពេលដែលស្ថានភាពភ្លៀងធ្លាក់ពុំស្រាកស្រាន នោះនៅតាមបណ្តាផ្លូវមួយចំនួន ពុំត្រឹមលិចលង់ទេ តែក៏អាចបង្កគ្រោះថ្នាក់ដល់អ្នកធ្វើដំណើរផងដែរ។ ជាក់ស្តែង ដូចផ្លូវមួយខ្សែនៅក្នុងស្រុកបវេល នៅពេលនេះពិតគួរឲ្យគ្រោះថ្នាក់ខ្លាំងណាស់ ព្រោះនៅព្រឹកមិញនេះ បុរសម្នាក់ជិះម៉ូតូឆ្លងកាត់ទឹកហូរខ្លាំង បណ្តាលឲ្យដួលត្រូវកម្លាំងខ្សែទឹកហូរនាំយកម៉ូតូទៅបាត់តែម្តង។ តែសំណាងហើយ ដែលម្ចាស់ម៉ូតូត្រូវបានគេដឹងថា គាត់បានស្រវេស្រវ៉ាតោងវ័ល្លឈើជាប់ ពុំនោះទេអាចនឹងមានគ្រោះថ្នាក់កើតឡើង។ ហើយខណៈពេលនោះ គាត់ក៏បានស្រែកហៅឲ្យបងប្អូនអ្នកដំណើរជួយគាត់ផង។
នេះបើយោងតាមគណនីហ្វេសប៊ុកឈ្មោះ Rayno Ty O ដែលបានឃើញហេតុការណ៍នេះផ្ទាល់ បានបង្ហោះវីដេអូយ៉ាងខ្លីប្រមាណ ១៧ វិនាទី ស្តីពីហេតុការណ៍ដ៏រន្ធត់នោះ និងភ្ជាប់សារផ្តាំផ្ញើដល់បងប្អូនដែលនឹងត្រូវប្រើប្រាស់ផ្លូវនេះឲ្យដឹងថា៖ «ផ្ដាំអ្នកចង់ទៅលេងបវេល សូមកុំជិះម៉ូតូឆ្លងកាត់អី ព្រោះព្រឹកនេះទឹកហូរខ្លាំង ហើយមិញនេះមានអ្នកជិះម៉ូតូឆ្លងបានហូរទៅតាមទឹកបាត់ហើយ»៕
