ភ្នំពេញ៖ ទីបំផុត នៅរសៀលថ្ងៃទី ៨ ខែ កញ្ញា ឆ្នាំ ២០២០ នេះសមត្ថកិច្ចនគរបាលខណ្ឌមានជ័យ បានស្រាវជ្រាវចាប់ខ្លួនឈ្មោះ អេង សំអាត ហៅ ពឹម សំអាត ដែលពាក់ព័ន្ធនឹងករណីប្រទូសកេរ ភេទលើក្មេងស្រី អាយុ ៧ ឆ្នាំ បានហើយ បន្ទាប់ពីរត់គេចខ្លួន ។
សមត្ថកិច្ចនគរបាលខណ្ឌ និង សមត្ថកិច្ច នគរបាល នៃ ស្នងការដ្ឋាននគរបាលរាជធានីភ្នំពេញ បានខិតខំស្រាវជ្រាវករណីនេះដើម្បីរកយុត្តិធម៌ឲ្យជនរងគ្រោះ បន្ទាប់ពីសារព័ត៌មាន ហ្វេសប៊ុក ដែលបានផ្សាយពី ករណីនេះរហូតទទួលបានលទ្ធផលលឿនរហ័ស ។
ស្នងការនគរបាលរាជធានីភ្នំពេញ បានឲ្យដឹងថា ក្រោយពីសមត្ថកិច្ចជំនាញនៃអធិការដ្ឋាននគរបាលខណ្ឌមានជ័យ បានធ្វើការតាមដាន និងស្រាវជ្រាវយ៉ាងយកចិត្តទុកដាក់លើករណីនេះរួចមក នៅរសៀលថ្ងៃ៨ ខែកញ្ញា ឆ្នាំ២០២០ នេះ សមត្ថកិច្ចនៃអធិការដ្ឋាននគរបាលខណ្ឌមានជ័យ បានអនុវត្តតាមដីការតុលាការដោយបានធ្វើការនាំខ្លួនឈ្មោះ អេង សំអាត ពីបទចោទប្រកាន់ “ប្រទូស្តកេរខ្មាស ” បញ្ជូនទៅតុលាការដើម្បីអនុវត្តតាមនីតិវិធីច្បាប់ ។
សូមបញ្ជាក់ថាក្នុងនាមជាមន្ត្រីអនុវត្តច្បាប់មិនដែលព្រងើយកន្តើយឬលាក់បាំងអ្វីឡើយ ជាក់ស្តែងសមត្ថកិច្ចមិនអាចអនុវត្តការងារណាដោយមិនមានភាពច្បាស់លាស់ឡើយ ហើយសមត្ថកិច្ចក៏មិនទុកករណីល្មើសណាមួយចោលដែរ ។ ដើម្បីឲ្យមានភាពច្បាស់លាស់មុននឹងអនុវត្តការងារអ្វីមួយ គឺសមត្ថកិច្ចត្រូវតែធ្វើការតាមជំនាញ ជាពិសេសត្រូវធ្វើការស្រាវជ្រាវឲ្យបានច្បាស់លាស់ជាមុនសិន ចៀសវាងការអនុវត្តខុស ឬចាប់មនុស្សខុស ។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានលើកឡើងពីករណីឈ្មោះ អេង សំអាត និង ពឹម សំអាត ។ ដើម្បីចៀសវាងការអនុវត្តខុស ឬចាប់មនុស្សច្រឡំតាមជំនាញ សមត្ថកិច្ចត្រូវតែធ្វើការតាមដាន ស្រាវជ្រាវឲ្យបានច្បាស់លាស់ជាមុនសិន មិនមែនសមត្ថកិច្ចមិនយកចិត្តទុកដាក់ ឬមិនអនុវត្តការងារដូចដែលសារព័ត៌មានមួយចំនួនចុះផ្សាយនោះទេ ហើយសមត្ថកិច្ចក៏មិនដែលទុកឲ្យជនល្មើសណាម្នាក់ដើរហើរដោយសេរីនោះដែរ ។ ជាក់ស្តែងដោយជនសង្ស័យតាមដីកាបង្គាប់របស់តុលាការមានឈ្មោះថា អេង សំអាត ( ជាអតីតបុគ្គលិកក្រុមហ៊ុនឯកជនមួយ) រីឯរូបភាពដែលសារព័ត៌មានមួយចំនួនបានយកទៅចុះផ្សាយនោះគឺ ឈ្មោះ ពឹម សំអាត ដែលជាមន្ត្រីនគរបាល ។
ដូច្នេះដើម្បីឲ្យដឹងការពិត សមត្ថកិច្ចជំនាញកំពុងតែស្រាវជ្រាវថាតើ អេង សំអាត និង ពឹម សំអាត ជាមនុស្សតែមួយ ឬមនុស្ស២នាក់ផ្សេងគ្នា ។
សមត្ថកិច្ចនៃស្នងការដ្ឋាននគរបាលរាជធានីភ្នំពេញ តែងតែខិតខំប្រឹងប្រែងអនុវត្តជំនាញ បម្រើប្រជាពលរដ្ឋ និងជួយដោះស្រាយបញ្ហាជូនប្រជាពលរដ្ឋគ្រប់ពេលវេលានៅពេលគាត់ជួបបញ្ហាផ្សេងៗ ។
នៅពេលស្រាវជ្រាវដឹងពីការពិតហើយ សមត្ថកិច្ចនៃស្នងការដ្ឋាននគរបាលរាជធានីភ្នំពេញ និងអនុវត្តតាមដីការបស់តុលាការ ក៏ដូចជាស្វែងរកចាប់ខ្លួនជនសង្ស័យឲ្យបានដើម្បីនាំយកមកផ្តន្ទាទោសតាមច្បាប់ ។ ស្របពេលដែលសមត្ថកិច្ចកំពុងតែប្រើប្រាស់ជំនាញស្រាវជ្រាវលើករណីនេះ សូមសារព័ត៌មានមួយចំនួនគួរតែចុះផ្សាយអ្វីដែលមានមូលដ្ឋានច្បាស់លាស់ ក៏ដូចជាទុកឲ្យសមត្ថកិច្ចជំនាញអនុវត្តតាមការងារជាក់ស្តែង ចៀសវាងសារព័ត៌មានមួយចំនួនដើរតួជាមន្ត្រីនគរបាលយុត្តិធម៌ផង និងតុលាការផង ។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមជម្រាបជូនសាធារណជន អ្នកសារព័ត៌មាន និងអ្នកប្រើប្រាស់បណ្ដាញទំនាក់ទំនងសង្គមជ្រាបថា :
១. ចំពោះជនសង្ស័យឈ្មោះ អេង សំអាត ភេទប្រុស អាយុ ៤០ឆ្នាំ ជនជាតិខ្មែរ មានមុខរបរជាបុគ្គលិកក្រុមហ៊ុនស្រាបៀរលីអូ មានទីលំនៅផ្ទះជួល លេខ១១A ភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ មិនមែនជាមន្ត្រីនគរបាល នៃអធិការដ្ឋាននគរបាលខណ្ឌមានជ័យនោះទេ ហើយជននេះត្រូវបានតុលាការចេញដីកាបង្គាប់ឲ្យចាប់ខ្លួនលេខ ៥០៥ ជ ដចន ចុះថ្ងៃទី៤ ខែ ឧសភា ឆ្នាំ ២០២០ ដោយលោក សោ សុភា ចៅក្រមស៊ើបសួរសាលាដំបូងរាជធានីភ្នំពេញ ពីបទប្រទូស្តកេរខ្មាសមានស្ថានទម្ងន់ទោសទាក់ទងជនរងគ្រោះ ប្រព្រឹត្តនៅចំណុចផ្ទះជួលលេខ១១A ភូមិ ឬស្សី សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ កាលពីអំឡុង ខែមិនា ឆ្នាំ២០១៨ ។
២. ចំពោះរូបភាពបុរសម្នាក់ ដែលស្លៀកពាក់ឯកសណ្ឋាននគរបាលត្រូវបានអ្នកសារព័ត៌មានមួយចំនួន បានយកមកចុះផ្សាយជាប់ពាក់ព័ន្ធនឹងករណីខាងលើនោះ ផ្អែកតាមការស្រាវជ្រាវរបស់នាយកដ្ឋានជំនាញបញ្ជាក់ថា មានឈ្មោះ ពឹម សំអាត អត្តលេខ.៨៨២៦៣ ជាមន្ត្រីមប្រើការងារនៅការិយាល័យការពារ នៃនាយកដ្ឋានរដ្ឋបាល នៃអគ្គនាយកដ្ឋានភស្តុភារ និងហិរញ្ញវត្ថុ ។
ម្យ៉ាងវិញទៀតករណីនេះកើតឡើងនៅខណ្ឌមានជ័យ ប៉ុន្តែអាណាព្យាបាលមិនបានមកដាក់ពាក្យបណ្តឹងដោយផ្ទាល់នៅប៉ុស្តិ៍នគរបាលរដ្ឋបាល ឬអធិការដ្ឋាននគរបាលខណ្ឌមានជ័យនោះទេ ។
ស្នងការដ្ឋាននគរបាលរាជធានីភ្នំពេញ សូមថ្លែងអំណរគុណចំពោះសាធារណជន អ្នកសារព័ត៌មាន និងបណ្ដាញទំនាក់ទំនងសង្គមដែលបានចូលរួមចំណែកក្នុងកិច្ចការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្
គម និងក៏ដូចជាការស្វែងរកយុត្តិធម៌សង្គមជាមួយស្ថាប័នអនុវត្តច្បាប់ ៕
