ភ្នំពេញ ៖ មនុស្ស៣នាក់ ត្រូវបានកម្លាំងនគរបាលឃាត់នាំយកទៅអប់រំភ្លាមៗ ចំណែក២នាក់ទៀត កាន់កែវស្រា យួរធុងរត់គេចខ្លួនក្រោយពីមនុស្សមួយក្រុមនេះ ប្រជុំគ្នាផឹកសុី ច្រៀងខារ៉ាអូខេ យ៉ាងសប្បាយ គ្មានខ្វល់ ពីកូវីដ មិនកូវីដ កាលពីវេលាម៉ោង៣រសៀល ថ្ងៃទី០៤ ខែមេសា ឆ្នាំ២០២១ នៅចំណុចផ្សារបឹងបៃតង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ ។
តាមនគរបាលបានឲ្យដឹងថា ខណៈដែល កម្លាំងសមត្ថកិច្ច អាជ្ញាធរ ពាក់ព័ន្ធ កំពុងយកចិត្តទុកដាក់ អនុវត្តន៍នូវគោលការណ៍ ក្រសួងសុខាភិបាល ស្រាប់តែនៅវេលាម៉ោងខាងលើ ទទួលបានព័ត៌មាន មានពលរដ្ឋមួយក្រុមកំពុងផឹកសុី ស្រែកច្រៀង ឡើងទ្រហឹង ហាក់ដូចជាពុំខ្វល់ នៃការរីករាលដាលជម្ងឺឆ្លងកូវីដ១៩ ទើបកម្លាំងនគរបាលខណ្ឌសែនសុខ ចុះទៅឃាត់ ហៅនាំបាន៣នាក់ ក្នុងចំណោមក្រុមអ្នកផឹកសុី៥នាក់ រួចនាំយកទៅធ្វើការអប់រំ នៅប៉ុស្តិ៍នគរបាល រួមទាំងដកហូតសម្ភារៈ ចាក់បំពងសម្លេងយកទៅរក្សាទុកទៀតផង ៕
