ភ្នំពេញ៖ ក្រសួងអប់រំ យុវជន និងកីឡា បានឱ្យដឹងថា មាតាបិតា អ្នកអាណាព្យាបាលសិស្សានុសិស្ស ប្រមាណ ៩០០នាក់ បានប៉ះពាល់ដោយផ្ទាល់ និងដោយប្រយោលជាមួយគណៈប្រតិភូហុងគ្រីដែលមានរដ្ឋមន្ត្រីដែលមានផ្ទុកជំងឺកូវីដ១៩ និងមានកូនចៅសិក្សានៅតាមគ្រឹះស្ថានសិក្សា។
ក្រសួងអប់រំ នៅថ្ងៃសោរ៍ ទី៧ ខែវិច្ឆិកា ឆ្នាំ២០២០នេះ បានធ្វើការណែនាំដល់មាតាបិតា អ្នកអាណាព្យាបាលខាងលើ ផ្អាកបញ្ជូនកូនចៅទៅកាន់សាលារៀនជាបណ្ដោះអាសន្ន ចំនួន ១៤ថ្ងៃ ដើម្បីធ្វើចត្តាឡីស័កនៅផ្ទះរៀងៗខ្លួន និងរៀនតាមប្រព័ន្ធអេឡិចត្រូនិក ព្រមទាំងត្រូវផ្ដល់ព័ត៌មានទៅកាន់គ្រឹះស្ថានសិក្សា ដើម្បីគ្រឹះស្ថានសិក្សាមានវិធានការក្នុងការទប់ស្កាត់ការរីករាលដាលនៃជំងឺកូវីដ១៩។
ដោយសារតែមានការវិវត្តថ្មីៗនេះ ពាក់ព័ន្ធនឹងជំងឺកូដ ១៩ ក្រសួងអប់រំ យុវជន និងកីឡាសូមស្នើដល់មាតា បិតា អ្នកអាណាព្យាបាលចំនួនប្រមាណ ៩០០ នាក់ ដែលបានប៉ះពាល់ដោយផ្ទាល់ និងដោយប្រយោលជាមួយគណៈ ប្រតិភូហុងគ្រី និងមានកូនចៅសិក្សានៅតាមគ្រឹះស្ថានសិក្សា សូមអនុវត្តវិធានការចាំបាច់មួយចំនួន ដូចខាងក្រោម ៖ ផ្លាកបញ្ជូនកូនចៅមកកាន់គ្រឹះស្ថានសិក្សាជាបណ្តោះអាសន្នចំនួន ១៤ ថ្ងៃ ដើម្បីចត្តាឡីស័កនៅផ្ទះរៀងៗខ្លួន និងរៀនតាមប្រព័ន្ធអេឡិចត្រូនិក ព្រមទាំងត្រូវផ្តល់ព័ត៌មានទៅកាន់គ្រឹះស្ថានសិក្សា គ្រឹះស្ថានសិក្សាមានវិធានការបន្តក្នុងការទប់ស្កាត់ការ រីករាលដាលនៃជំងឺកូវីដ ១៩ បន្ទាប់ពីទទួលបានព័ត៌មាន គ្រឹះស្ថានសិក្សាត្រូវចាត់វិធានការតាមការណែនាំរបស់ក្រសួងក្នុងការទប់ស្កាត់ការរីករាលដាលនៃជំងឺកូវីដ១៩ និងបូកសរុប និងធ្វើបច្ចុប្បន្នកម្មរបាយការណ៍ ព្រមទាំងផ្ញើជូន មន្ទីរអប់រំ យុវជន និងកីឡារាជធានី ខេត្ត និងក្រសួងអប់រំ យុវជន និងកីឡាជាទៀងទាត់ ។
ទទួលបានសេចក្តីណែនាំនេះ សូម ឯកឧត្តម លោកជំទាវ លោក លោកស្រី ប្រធានមន្ទីរអប់រំ យុវជន និងកីឡា រាជធានី ខេត្ត ប្រធានការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ គណៈគ្រប់គ្រងគ្រឹះស្ថានសិក្សា សាធារណៈ និងឯកជន មាតាបិតា អ្នកអាណាព្យាបាល ត្រូវអនុវត្តសេចក្តីណែនាំនេះឱ្យបានល្អប្រសើរ និងមាន ប្រសិទ្ធភាពខ្ពស់ ។
មន្ទីរអប់រំ យុវជន និងកីឡារាជធានីភ្នំពេញបានចេញ របាយការណ៍ ស្តីពី សាលារៀន ដែលមានអាណាព្យាបាលសិស្ស ចូលរួមទទួលគណៈប្រតិភូ ប្រទេស ហុងត្រី ។
សេចក្តីដូចបានគោរពជម្រាបជូនក្នុងកម្មវត្ថុខាងលើ សូមឯកឧត្តម បណ្ឌិតសភាចារ្យមេត្តាជ្រាបថា ៖ កាលពី ថ្ងៃទី ០៣ ខែ វិច្ឆិកា ឆ្នាំ២០២០ មានអាណាព្យាបាលសិស្សមួយចំនួន នៃសាលាចំណេះទូទៅឯកជន បានចូលរួមទទួល គណៈប្រតិភូអញ្ជើញមកពីប្រទេសហុងគ្រី ដែលបានទស្សនៈកិច្ចនៅប្រទេសកម្ពុជា។ សាលាចំណេះទូទៅឯកជនដែលមាន អាណាព្យាបាលសិស្សចូលរួមទទួលគណៈប្រតិភូ ហុងគ្រី បានផ្អាកការសិក្សាសិស្សថ្នាក់ទាំងនោះ ដោយទុកពេលសម្រាប់ ធ្វើចត្តាឡីស័ក។
គួររំឭកថា រដ្ឋមន្ត្រីក្រសួងការបរទេស និងពាណិជ្ជកម្មនៃប្រទេសហុងគ្រី លោក ភីធើ ស៊ីចាតូ ត្រូវបានធ្វើតេស្តរកឃើញ វិជ្ជមានកូវីដ១៩ នៅក្នុងប្រទេសថៃ បន្ទាប់ពីលោកបានបញ្ចប់ទស្សនកិច្ចផ្លូវការនៅប្រទេសកម្ពុជា៕
