នារីរូបស្រស់បើករថយន្តស៊េរីទំនើបបុករះរថយន្តនិងម៉ូតូជាច្រើនគ្រឿងនៅមុខហាងពិភពសាច់អាំង៤ បណ្តាលឲ្យបុរសជាសន្តិសុខហាងម្នាក់រងរបួសធ្ងន់
ចេញផ្សាយ ថ្ងៃទី October 10, 2020
ភ្នំពេញ: នារីរូបស្រស់ម្នាក់សង្ស័យស្រវឹងស្រាបើករថយន្តស៊េរីទំនើបម៉ាកPEUGEOTមួយគ្រឿង បុករះរថយន្ត ២គ្រឿងនិងម៉ូតូ២គ្រឿងរបស់ភ្ញៀវចូលផឹកសុីចតស្ងៀមនៅមុខហាងបណ្តាលការខូចខាតយ៉ាងដំណំនិងរបួសធ្ងន់សន្តិសុខយាមហាងម្នាក់។
ហេតុការណ៍នេះកើតឡើងកាលពីវេលាម៉ោង០៨យប់ថ្ងៃទី០៩ ខែតុលាឆ្នាំ២០២០នៅចំណុចមុខហាង(ពិភព សាច់អាំង៤) តាមបណ្ដោយផ្លូវ៥៦៦ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។
តាមប្រភពពីកន្លែងកើតហេតុបានប្រាប់ឲ្យដឹងថាមុនកើតហេតុគេឃើញនារីរូបស្រស់ម្នាក់បើករថយន្តស៊េរីទំនើបម៉ាកPEUGEOT មួយគ្រឿងពណ៌សពាក់ស្លាកលេខភ្នំពេញ2BE-9400ធ្វើដំណើរទិសដៅពីកើតទៅលិចក្នុងល្បឿនលឿនលុះមកដល់ចំណុចកើតហេតុខាងលើបានរេចង្កូតមកខាងស្ដាំដៃជ្រុលទៅបុករះ រថយន្តទី១ ម៉ាក hillux vigo ទី២ម៉ាកsuzuki និងបន្តបុកម៉ូតូពីរគ្រឿងទៀតម៉ាកហុងដាឌ្រីម១គ្រឿង និងម៉ាកហុងដាស្កុបពី ដែរភ្ញៀវចតស្ថៀមនៅមុខហាង បណ្តាលឲ្យសន្តិសុខយាមហាងម្នាក់ដួលផ្ងាក្រោយរងរបួសធ្ងន់។ភ្លាមៗនោះម្ចាស់រថយន្តបង្កបានហៅម៉ូតូកង់បីដឹកជនរងគ្រោះជាសន្តិសុខបញ្ជូនទៅសង្គ្រោះនៅឯមន្ទីរពេទ្យដោយខ្លួនឯង។ចំណែកម៉ូតូមួយគ្រឿងម៉ាកហុងដាស្គុបពីរងការខូចខាតបន្តិចបន្តួចម្ចាស់មិនចង់មានរឿងវែងឆ្ងាយបានយកទៅជួសជុលខ្លួនឯង។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំធ្វើការដោះស្រាយគ្នាទៅតាមផ្លូវច្បាប់។
