ភ្នំពេញ ៖ ជនដៃដល់ម្នាក់ បានទាញកាំភ្លើងបាញ់សំដៅទៅលើជនរងគ្រោះ៣គ្រាប់ បណ្តាលឲ្យត្រូវមនុស្ស៣នាក់ រងរបួសធ្ងន់ម្នាក់ និង២នាក់ទៀតស្លាប់ ក្រោយពេលបញ្ជូនដល់មន្ទីរពេទ្យ។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង៨ និង២០នាទីយប់ថ្ងៃព្រហស្បតិ៍ទី១១ ខែកុម្ភៈ ឆ្នាំ២០២១ ស្ថិតនៅតាមបណ្តោយផ្លូវបេតុង ចំណុចក្នុងបុរីប៊ុនហួរ សង្កាត់ចោមចៅទី២ ខណ្ឌពោធិ៍សែនជ័យ។
ប្រភពព័ត៌មានពីបងស្រីត្រូវជាប្រពន្ធភាគីខាងជម្លោះ នៅកន្លែងកើតហេតុបានឲ្យដឹងថា មុនពេលកើតហេតុ ប្តីរបស់គាត់បានបើករថយន្តទៅយកកូន រួចបានបើកត្រឡប់មកផ្ទះវិញ ហើយបានចតរថយន្តនៅជិតផ្ទះ រួចបើកទ្វារចុះយកកូនទៅចូលក្នុងផ្ទះមួយភ្លែត ស្រាប់តែមានអ្នករត់ម៉ូតូកង់បីម្នាក់ បើកពីក្រោយរថយន្ត ហើយស៊ីផ្លេឲ្យភាគីខាងរថយន្តជៀស តែខាងម្ចាស់រថយន្តគាត់ថាឲ្យចាំបន្ទិច គាត់ដាក់កូនចូលផ្ទះសិន បែរជាភាគីខាងម៉ូតូកង់បីមិនព្រម ចុះទៅវាយប្រតាយប្រតប់គ្នា រួចខាងម៉ូតូកង់បីបានតេហៅបក្ខពួកមកជាច្រើននាក់វាយគ្នាផ្អើលពេញផ្លូវ ដោយឃើញបែបនេះ ស្រាប់តែខាងជនរងគ្រោះ៣នាក់ គាត់បានចូលមកជួយសម្របសម្រកុំឲ្យឈ្មោះគ្នា ដឹងអីខាងម៉ូតូកង់បីស្មានតែឃ្នីគ្នាម្ចាស់រថយន្ត ក៏ទាញកាំភ្លើងបាញ់សំដៅជនរងគ្រោះ៣នាក់ ត្រូវម្នាក់មួយគ្រាប់ បណ្តាលឲ្យស្លាប់២នាក់ និងម្នាក់ទៀតរបួសធ្ងន់។ រួចក៏រត់ឡើងម៉ូតូកង់បី បើករត់គេចខ្លួនបាត់ស្រមោល។
ក្រោយពេលកើតហេតុ សមត្ថកិច្ចខណ្ឌពោធិ៍សែនជ័យ សហការជាមួយនិងខាងកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ បើកការស្រាវជ្រាវ ដើម្បីតាមឃាត់ជនដៃដល់មកចាត់ការទៅតាមផ្លូវច្បាប់៕
