សមត្ថកិច្ចខេត្តព្រះសីហនុ ឃាត់ជនសង្ស័យ ៨នាក់ មានជនជាតិចិន៦នាក់ និង ខ្មែរ២នាក់ ក្នុងករណីជនជាតិចិន ចាប់ជនរងគ្រោះចំនួន២នាក់ ដាក់រថយន្ត

(ខេត្តព្រះសីហនុ) ជនសង្ស័យ ៨នាក់ មានជនជាតិចិន៦នាក់ និង ខ្មែរ២នាក់ ត្រូវបានសមត្ថកិច្ច ខេត្តព្រះសីហនុ ឃាត់ខ្លួនបានហើយ ក្នុងករណីជនជាតិចិន ចាប់ជនរងគ្រោះចំនួន២នាក់ ដាក់រថយន្ត នៅក្រុងព្រះសីហនុ។ ហេតុការណ៍នេះ កើតឡើង នៅម៉ោងជាង១២រំលងអាធ្រាត្រ ឈានចូលថ្ងៃទី០៦ ខែសីហា ឆ្នាំ២០២៤ នៅម្តុំស្តុបផ្សារពាណិជ្ជកម្ម មុខអាហារដ្ឋាន ឈ្មោះ តុងប៉ីហ្សាវខាវ ស្ថិតនៅភូមិ២ សង្កាត់លេខ២ ក្រុង-ខេត្តព្រះសីហនុ។ ក្រោយកើតហេតុ សមត្ថកិច្ច បានដាក់កំលាំងបើកកិច្ចប្រតិបត្តិការស្រាវជ្រាវជាបន្ទាន់ រហូតដល់ម៉ោង ០២និង៣០ព្រឹក ថ្ងៃទី០៦ ខែឆ្នាំដដែល កម្លាំងជំនាញឈានដល់ការឃាត់ខ្លួនជនសង្ស័យសរុប៨នាក់ (ជនជាតិចិន ៦នាក់ និងខ្មែរ២នាក់) រំដោះជនរងគ្រោះបានចំនួន០២នាក់ (ស្រ្តីខ្មែរ០១នាក់ និងជនជាតិចិន០១នាក់)។ សូមបញ្ជាក់ថា ករណីខាងលើ កម្លាំងជំនាញនៃស្នងការដ្ឋាននគរបាលខេត្តបានដកហូតនូវ កាំភ្លើងខ្លី០២ដើម ខ្នោះដៃចំនួន០២គូរ និងវត្ថុតាងមួយចំនួនទៀត។ បច្ចុប្បន្នកម្លាំងជំនាញកំពុងស្រាវជ្រាវបន្តដើម្បីកសាងនិតិវិធីច្បាប់បញ្ជូនទៅតុលាការ៕