ភ្នំពេញ៖ រដ្ឋបាលខណ្ឌដូនពេញ សម្រេចផ្អាកការដ្ឋានសាងសង់ ១កន្លែង ដែលធ្វេសប្រហែសបណ្តាលឲ្យដាច់ខ្សែជណ្តើរយោង បង្កឲ្យមានមនុស្សបាត់បង់ជីវិត ហើយម្ចាស់ការដ្ឋាន ត្រូវដោះស្រាយសំណងរដ្ឋប្បវេណីដល់គ្រួសារសព និងគ្រួសារអ្នករងរបួសធ្ងន់ឲ្យបានចប់សព្វគ្រប់ជាមុនសិន ។ លោកថា បន្ទាប់ពីម្ចាស់ការដ្ឋាន បានដោះស្រាយបញ្ហានាំរបស់រដ្ឋបាលខណ្ឌដូនពេញចំនួន ៤ចំណុច ចប់សព្វគ្រប់ហើយ ម្ចាស់ការដ្ឋានសំណង់ ត្រូវដាក់ពាក្យស្នើសុំបើកការដ្ឋានឡើងវិញពីរដ្ឋបាលខណ្ឌដូនពេញ ។
នៅព្រឹកថ្ងៃព្រហស្បតិ៍ ទី២០ ខែសីហា ឆ្នាំ២០២០ វេលាម៉ោង១០និង៣០នាទី ដោយអនុវត្តន៍តាមប្រសាសន៍ដឹកនាំផ្ទាល់របស់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានដឹកនាំក្រុមការងារចម្រុះខណ្ឌ ចុះផ្អាកដ្ឋានសាងសង់ ស្ថិតនៅផ្លូវលេខ២០០ ភូមិ០៦ សង្កាត់បឹងរាំង ខណ្ឌដូនពេញ រាជធានីភ្នំពេញ ដែលបានធ្វេសប្រហែសបណ្តាលឲ្យកម្មករគ្រោះថ្នាក់បាត់បង់ជីវិតចំនួន ១នាក់ និង រងរបួសធ្ងន់ ១នាក់ បានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត ។
ក្រុមការងារបានសម្រេចដូចខាងក្រោម :១ – ផ្អាកការដ្ឋានសាងសង់ជាបណ្ដោះអាសន្ន ។ ២ – ម្ចាស់ការដ្ឋាន ត្រូវដោះស្រាយសំណងរដ្ឋប្បវេណីដល់គ្រួសារសព និងគ្រួសារអ្នករងរបួសធ្ងន់ឲ្យបានចប់សព្វគ្រប់ជាមុនសិន ។ ៣ – មិនអនុញ្ញាតឲ្យក្រុមជាង និងកម្មករស្នាក់នៅក្នុងការដ្ឋានក្នុងអំឡុងពេលផ្អាកការសាងសង់បណ្តោះអាសន្ននេះឡើយ ។ ៤ – ត្រូវរៀបចំប្រព័ន្ធសុវត្ថិភាពការដ្ឋានឡើងវិញឲ្យបានត្រឹមត្រូវ ។ ៥ – បន្ទាប់ពីម្ចាស់ការដ្ឋានបានអនុវត្តតាមចំណុចទី១ ទី២ ទី៣ និងទី៤ ខាងលើបានចប់សព្វគ្រប់ហើយ ម្ចាស់ការដ្ឋានសំណង់ ត្រូវដាក់ពាក្យស្នើសុំបើកការដ្ឋានឡើងវិញពីរដ្ឋបាលខណ្ឌដូនពេញ ៕
